Sicrhawyd buddsoddiad sylweddol ar gyfer Cartref Dylan Thomas, gyda gwelliannau cyffrous i brofiad ymwelwyr ar y gweill

Mae cartref teuluol olaf Dylan Thomas wedi bod ar agor i’r cyhoedd ers dros 50 mlynedd. Bydd y buddsoddiad hwn yn cefnogi gwaith adnewyddu sylweddol ar y gofod arddangos ar y llawr uchaf, gan gynnwys oriel bwrpasol ar gyfer arddangosfeydd dros dro, a deunydd dehongli wedi’i ddiweddaru sy’n cynnwys arddangosion aml-synhwyraidd a sgriniau cyffwrdd. Bydd profiad digidol newydd hefyd yn galluogi pobl unrhyw le yn y byd i archwilio golygfa 360 gradd o gartref Dylan Thomas. Bydd y casgliad ei hun hefyd yn elwa, gyda chasys arddangos arbenigol o safon amgueddfa, bleindiau haul, a fframiau cadwraeth, a fydd yn helpu i’w ddiogelu ar gyfer cenedlaethau i ddod.

Mae’r amgueddfa wedi ymrwymo i ddod yn fwy hygyrch a chroesawgar i deuluoedd. Bydd y llawr uchaf, sydd wedi’i adnewyddu, yn gwahodd ymwelwyr o bob oed i brofi byd dychymyg Dylan Thomas, ei gymeriadau, a’i ddelweddau barddonol. Mae hyn yn cynnwys y cornel gweithgareddau poblogaidd i blant, bagiau synhwyraidd, ac ardal ar gyfer amser stori.

Daw’r buddsoddiad yn sgil gwaith cynllunio helaeth gan CofGâr – gwasanaeth amgueddfeydd ac y celfyddydau Cyngor Sir Gaerfyrddin – i ddatblygu gweledigaeth hirdymor ar gyfer y Cartref. Mae CofGâr wedi rheoli’r amgueddfa ers 2023.

Er mwyn galluogi i’r gwaith gael ei gwblhau’n ddiogel ac yn effeithlon, bydd Cartref Dylan Thomas ar gau dros dro yn ystod mis Tachwedd a mis Rhagfyr 2026. Dewiswyd yr amseriad hwn er mwyn lleihau’r tarfu ar ymwelwyr cyn belled ag sy’n bosibl.

Bydd CofGâr yn rhannu diweddariadau rheolaidd am y gwaith a’r broses o ailagor trwy ei wefan a’i sianeli cyfryngau cymdeithasol.