Darganfyddwch brofiad fideo trochi Babs
Peidiwch â cholli profiad fideo gwych Babs, sy'n eich galluogi i deimlo'r grymoedd fel pe baech yn gyrru'r car rasio chwedlonol ar hyd y tywod!
Wrth wraidd yr Amgueddfa Cyflymder mae'r straeon am feiddgarwch a dyfeisgarwch a yrrodd yr ymdrechion i dorri’r record cyflymder tir ar Draeth Pentywyn. Er na fydd y rhan fwyaf ohonon ni byth yn cael y cyfle i roi cynnig ar rasio peiriant dwy dunnell ar hyd y traeth, gallwn ni roi'r peth gorau nesaf i chi.
Mae ein profiad fideo rhyngweithiol yn efelychu'r dirgryniadau, y gwynt cryf, a sŵn aruthrol gyrru ar gyflymder yn Babs, car rasio chwedlonol J.G. Parry-Thomas. Ar ôl dechrau’r daith yn ddigon tawel, mae'r antur yn dwysáu, wrth i chi weld y tywod yn ysgubo heibio o safbwynt y gyrrwr wrth i'r stopwatsh dicio i lawr. Mae'n daith wefreiddiol!
Mae'r fideo yn ail-greu rhediad Babs ar y traeth a wnaeth dorri'r record ym mis Ebrill 1926. Wedi'i yrru gan y Cymro, Parry-Thomas, cyrhaeddodd y car gyflymder uchaf dros y filltir wib o fwy na 171mya. Felly dyma oedd y car cyflymaf yn y byd am bron i flwyddyn hyd at ddechrau 1927, gan fod yn 18mya yn uwch na'r record flaenorol – cynnydd o dros 10%.
Ar ôl gosod dwy record cyflymder y byd ym Mhentywyn ym 1924 a 1925, daeth Syr Michael Campbell yn ôl ym 1927 i adennill y record oddi wrth Parry-Thomas yn ei gar Napier Bluebird newydd. Fodd bynnag, pan geisiodd Parry-Thomas adennill ei deitl fis yn ddiweddarach, cafodd ei ladd mewn modd trasig wrth i Babs droi drosodd ar gyflymder. Dangosodd hyn pa mor beryglus yw gwthio'r ffiniau fel gyrrwr.